Paritet.az :: İctimai-siyasi qəzet: Prezident Davosda görüşlər keçirib

Prezident Davosda görüşlər keçirib
================================================================================
Agasef  Memmedov  on 27/01/2012/ 19:32
 
Prezident İlham Əliyev yanvarın 26-da Davosda RWE şirkətinin baş icraçı
direktoru Yurgen Qrossman ilə görüşüb.Görüşdə Azərbaycan ilə RWE
şirkəti arasında uğurlu əməkdaşlığın davam etdiyi bildirildi və
əlaqələrin perspektivləri ilə bağlı fikir mübadiləsi aparılıb.
Energetika sahəsində əməkdaşlığın önəminin qeyd olunduğu görüşdə
“Şahdəniz” qaz yatağının işlənilməsi ilə bağlı məsələlər
müzakirə edilib.
Prezidentin  “Holcim Group” şirkətinin idarə heyətinin sədri Markus
Akerman ilə görüşündə  şirkətinin Azərbaycandakı fəaliyyətindən,
ölkəmizə investisiya qoymasından və bu şirkətin Qaradağ sement zavodunun
tikintisində iştirakından məmnunluq ifadə olunub(APA).
Azərbaycanda birlikdə təməli qoyulan yeni sement zavodunun bu il
istifadəyə veriləcəyinin vurğulandığı görüşdə bunun iqtisadi
əlaqələrimizin genişlənməsində önəmli hadisə olduğu
bildirilib.Prezident “Edisson” şirkətinin baş icraçı direktoru Bruno
Leskör ilə Davosda görüşüb.Görüşdə Cənubi Avropa regionunun təbii
qazla təmin edilməsi ilə bağlı müzakirələr aparılıb.
Dünənsə  Polşa prezidenti Bronislav Komorovski ilə görüşü
olub.Görüşdə Azərbaycanla Polşa arasında ikitərəfli münasibətlərin
bütün sahələrdə yüksək səviyyədə inkişafından məmnunluq ifadə
olunub. Azərbaycan və Polşa prezidentlərinin müxtəlif tədbirlərdə
mütəmadi görüşlərinin bu münasibətlərin daha da inkişafına töhfə
verdiyi vurğulanıb.
Görüşdə Azərbaycanla Polşa arasında bir sıra sahədə əlaqələrin daha
da inkişaf etdirilməsi, o cümlədən enerji sahəsində əməkdaşlıqla
bağlı məsələlər ətrafında fikir mübadiləsi aparılıb.
Böyük Britaniyanın York Hersoqu, şahzadə Endryu ilə görüşdə
Azərbaycanla Böyük Britaniya arasında iqtisadi əlaqələrin uğurla
inkişaf etdiyi vurğulanıb, bu sahədə əməkdaşlığın perspektivləri
müzakirə edilib.
Pakistan İslam Respublikasının baş naziri Sayed Yusuf Raza Gilani ilə
görüşdə Gilani  Azərbaycanın BMT Təhlükəsizlik Şurasının qeyri-daimi
üzvü seçilməsi münasibətilə prezident İlham Əliyevi təbrik edib.
Görüşdə əlaqələrimizin yüksək səviyyədə olmasından məmnunluq
ifadə edilib və bunun çox böyük əhəmiyyətə malik olduğu vurğulanıb.
Azərbaycanın və Pakistanın bir-birini həm ikitərəfli müstəvidə, həm
də beynəlxalq təşkilatlar çərçivəsində daim dəstəklədiyi bildirilib
və bu dəstəyin bundan sonra da davam etdirilməsinin əhəmiyyəti qeyd
olunub.
Görüşdə ölkələrimiz arasında neft-qaz, infrastruktur, kənd
təsərrüfatı və digər sahələrdə əməkdaşlığın inkişaf etdirilməsi
ətrafında fikir mübadiləsi aparılıb.