“Bu il Praqada diasporamızın media mərkəzini və radiomuzu yaratmaq istəyirik”

Elşən Nəzərov: “Çexləri daha çox Azərbaycan mədəniyyəti, kulinariyası, təbiəti maraqlandırır”

 

  Bu gün  xarici ölkələrdə mövcud  olan  bir sıra  diaspor təşkilatlarımızın rəhbərlərinin  fəaliyyət göstərdikləri ölkələrin  ictimai,  siyasi  həyatında   fəallığı   və müəyyən sahələrdə  təmsil olunmağı sevindirici haldır. Çünki onların əhatə dairəsi daha da genişlənir,  Azərbaycanla bağlı olaraq keçirdikləri  tədbirlərə  çoxlu sayda həmin ölkələrin  rəsmilərini və  siravi vətəndaşlarını dəvət etmək imkanı əldə edirlər. Bu da ölkəmizin geniş əcnəbi auditoriyasına  tanıdılmasına çox böyük dəstək olur. Bu cür  ictimai fəallığı ilə seçilən təşkilatlardan biri də   Azər -Çex  Cəmiyyətidir (AÇC) .    AÇC sədri   Elşən Nəzərov söhbətində  ilk olaraq  təşkilatın  yaranma tarixindən danışdı və bildirdi ki, AÇC  28 may 2003-cü il tarixində   Çexiyanın paytaxtı Praqa şəhərində  yaradılıb:

-Qeyd edim  ki,  bizim təşkilat  yaranana  qədər Çexiyada fəaliyyət göstərən  rəsmi və ya qeyri -rəsmi  diaspora təşkilatı olmadığı  üçün  Azər-Çex Cəmiyyətinin yaranma  zərurəti  ortaya çıxdı.  Bu təşkilatın   yaranmasının təşəbbüskarı  mən oldum.  Təşkilata 2003-cü ildən bu günə qədər  sədrlik  edirəm.  Bu  gündə  fəaliyyətimizi  davam  etdiririk.  Əsas məqsədimiz  Azərbaycanla Çexiya arasında əlaqələri  daha da yaxınlaşdırmaq, eyni zamanda burda  ölkəmizin mətbəxini, mədəniyyətini, tarixini, ədəbiyyatını  çexlərə təqdim etməkdir.

 

Hazırda Praqada “Azərbaycan evi”  mövcuddur

 

-İndi  təşkilatımızın  binası yoxdur, ancaq ofisi var. Onu da vurğulayım ki,  bu ofis Praqada ilk və yeganə  “Azərbaycan evi “kimi  fəaliyyət göstərir.  Təşkilatımız bu  dörd otaqdan ibarət  olan məkanı kirayə tutub, artıq 4 ilə yaxındır,  çətin də olsa fəaliyyətimizi   burda davam etdirməyə  çalışırıq. Çexiyada yaşayan azərbaycanlılarla çox  sıx əlaqələrimiz var. Ən azından  ayda bir dəfə  “Azərbaycan evi”ndə toplaşırıq. Eyni zamanda milli bayramlarımızı, tariximizin yaddaşına yazılmış   faciələrimizidə qeyd edən zaman əcnəbilərlə yanaşı, orda yaşayan soydaşlarımızı da dəvət edirik.

 

“Azərbaycan turizm obyekti kimi də  çexlərin  marağındadır”

Çexiyada ümumilikdə 500 nəfərə yaxın azərbaycanlının  yaşadığını deyən  cəmiyyət sədri bildirdi ki,  həmvətənlərimizlə sıx əməkdaşlıq edirlər və onların hər hansı bir problemi olarsa dəstək göstərirlər:

-Çalışırıq ki,   çexlərlə  azərbaycanlılar arasında  yaxşı bir şəbəkə quraq.  Çexlərdə də ümumilikdə Azərbaycan sevgi var.  Onları  daha çox  Azərbaycan  mədəniyyəti, kulinariyası, təbiəti maraqlandırır. Ancaq  onu da qeyd edim ki, çex biznesmenlərini və siyasətçilərini  Azərbaycanla bağlı  digər  dəyərlər maraqlandırır. Eyni zamanda  gözəl və rəngarəng təbiətə  malik olan Azərbaycana   Çexiyada  turizm obyekti  kimi də  maraq çox böyükdür. Ancaq bu maraqda çexlər arasında kütləvi xarakter daşımır. Ona görə ki,  ölkəmizdə turizm  sektoru üçün  yetərincə infrastruktur yoxdur və qiymətlər bahadır. Yəni  hotel və qida xərcləri Çexiyadakından çoxdur.  Ancaq inanıram ki, 2011-ci il   ölkə Prezidentinin  “Turizm ili” elan etməsi   Azərbaycanda bu sahədə inkişafa səbəb olacaq. Həmçinin  Çexiya və Azərbaycan arasında da turizm sektoru üzrə əlaqələrin inkişafına səbəb olacaq.

AÇC-nin nəzdində  Azərbaycan dili  kuslarının tədris  olunmadığını deyən həmsöhbətim qeyd etdi ki,  buna səbəb maddi vəsaitlərinin olmamasıdır:

- Çexiyada yaşayan azərbaycanlıların qarşılaşdığı problemlərə gəlincə isə qeyd edim ki,  hazırda  çex dilini  heç və ya yaxşı bilməmələri , qanunlara yaxından bələd olmamaları   və çex mətbəxinə  alışmamaq kimi problemlər mövcuddur.  Amma qeyd edim ki,  hazırda  Çexiyada  təhsil alan tələbələrimizi  diaspora   fəaliyyətinə cəlb  etməyə çalışırıq.  Çünki bu gün  bir sıra xarici ölkələrdə  intellektli, savadlı və potensiallı gənclərimiz  var.  Bu cür gənclərimizin  diaspor işinə cəlb edilməsi çox vacibdir.  Buna görə də  Çexiya Tələbə və Gənclər Təşkilatı yaratdıq. Bu  təşkilatında öz  iş  prinsipi var. Çalışmışıq ki, bu tələbə təşkilatının ətrafında ordakı gənclərimizi toplayaq və ictimai fəaliyyətə cəlb edək.

 Azərbaycan  və Çexiya arasında əlaqələrdən danışan  E. Nəzərov söylədi ki,  iki  ölkə  arasında əlaqələr daha çox turizm  sahəsində  inkişaf edib:” Bundan başqa  Azərbaycan və Çexiya arasında  təhsil və iqtisadi  əlaqələrdə  inkişaf edib.

Ümumilikdə götürdükdə  bir çox sahələr üzrə əlaqələr mövcuddur.  Əminəm ki, gələcəkdə iki ölkə arasında əlaqələrin daha da sıx olması  üçün bizdə bir sıra layihələr icra edəcəyik.  Bu gün ümumilikdə Çexiyada  Azərbaycan diaspor mediasının  olmadığını deyən E. Nəzərov qeyd etdi ki,  AÇC-nin sadəcə bu funksiyanı  yerinə yetirən  saytı var:  “Yəni cəmiyyətimizin nəşri orqanı olmasa da ancaq  artıq yeddi ildir ki,  fəaliyyət  göstərən saytı (www.diaspora.cz) var. Saytımızda  keçirdiyimiz tədbirlər,  AÇC-i, Azərbaycan və Çexiya haqqında  və başqa bir sıra məsələlərlə bağlə  ətraflı məlumatlar yerləşdirilib”.

 

AÇC-də türk uşaqları üçün  “Bazar günü” məktəbi fəaliyyət

göstərir

 

-Bundan başqa qeyd edim ki, bu gün  AÇC Çexiyada  fəaliyyət göstərən xarici diaspora təşkilatlarının siyahısında ön cərgədə  dayanır , eyni zamanda qeyri-hökumət təşkilatları  sırasında da qabaqcıl təşkilatlardan biri sayılır.  Bizim təşkilatın əlaqələri və əhatə dairəsi də genişdir. Belə ki,  Çexiyada fəaliyyət göstərən türklərlə və  digər diaspor  təşkilatlarımız ilə əlaqələrimiz  var. Bir-birimizlə sıx əməkdaşlığımız qurulub və  qarşılıqlı olaraq tədbirlərimizdə iştirak edirik.  Onu da qeyd edim ki, hətta  Çexiyada  türk diasporunun  yaranmasında da Azər-Çex Cəmiyyəti  yaxından  köməklik göstərib.  Həmçinin  bizim cəmiyyətin ofisində  türk uşaqları  üçün  “Bazar günü”  məktəbi fəaliyyət göstərir.

Bu gün dünyada fəaliyyət göstərən  diaspor təşkilatlarımızın fəaliyyətindən və təşkilatlanmasından razı qaldığını  bildirən E. Nəzərov  söylədi ki, sadəcə təşkilatlarımızın fəaliyyətlərinin daha da konstruktiv və  effektli olmasını istərdi:

- Diasporla İş üzrə Dövlət  Komitəsi  ilə əlaqə və əmakdaşlığımız  yaxşı səviyyədədir.  Bu il Bakıda  keçiriləcək Dünya Azərbaycanlılarının III Qurultayından bir sıra gözləntilərim var. Qarşıdan gələn qurultaydan gözlədiklərimiz odur ki,  dünya miqyasında  fəaliyyət göstərən diaspor təşkilatlarımıza   impuls verəcək, kəmiyyətinə və kefiyyətinə görə digər qurultaylardan fərqlənəcək .  Mən III Qurultayda cənab prezidentimiz İlham Əliyevin  çıxışını  səbrsizliklə gözləyirəm.

 

 Bu il Praqada Sül meydanında “Xocalı

soyqırımı” ilə bağlı tədbir keçiriləcək

 

AÇC-nin ötən il  keçirdiyi  tədbirlərdən danışan  E. Nəzərov qeyd etdi ki,  ötən il  ondan çox tədbir keçiriblər:

- Bu tədbirlərdən  əhatə dairəsinin genişliyi və böyüklüyü ilə seçilən tədbirlərimiz   Azərbaycan xalqının tarixinə  qanlı hərflə yazılmış  20 Yanvar  və “Xocalı soyqırımı”na  həsr edilmiş “Xocalıya işıq” adlı tədbirlər idi. Bu tədbirlər zamanı iştirakçılara faciə ilə bağlı ətraflı məlumat veririk və maarifləndirici bukletlər paylayırıq.   Bundan başqa  zəngin kökləri olan  mədəni irsimizi və adət-ənənələrimizin də təbliği istiqamətində  bir sıra tədbirlər həyata keçiririk.  Belə ki, milli bayramımız olan  və YUNESKO-nun  qeyri-maddi  mədəni irs siyahısına daxil olan  Novruz bayramı,  muğamla bağlı  mədəni mərasimlər keçirmişik və “Xəzər axşamı” kimi tədbirlərini də  reallaşdırmağa nail olmuşuq. Məlumat üçün bildirim ki,  bu ildə “Xocalı  soyqırımı” ilə bağlı      böyük bir tədbir  keçirməyi  planlaşdırırıq.  Çexiyanın  Lidçe  şəhərində   Xocalı  küçəsinin    açılması haqqında  uğura nail olmuşuq.  Bu il isə  Praqanın  mərkəzi Sül  meydanında  600 nəfərlik aksiya  keçirməyi planlaşdırırıq və hazırda  bunun üçün hazırlıq işləri aparılır.

2011-ci ildə bir  sıra yenilikləri olduğunu qeyd edən  müsahibim bunları dedi:

- Praqada  diasporumuzun media mərkəzini  və radiosunu yaratmaqla bağlı, artıq iki ildir ki,  Diasporla İş  üzrə Dövlət Komitəsinə müraciət etmişik . Ümid edirəm ki, bu il   sözügedən layihəni uğurla  icra edərək başa çatdıracayıq.

Günay ƏLİYEVA